NCH 813 — Dies irae, dies illa | New Catholic Hymnal

NCH 813

Dies irae, dies illa

Hymn Text

Verse 1

Dies irae, dies illa
Solvet saeclum in favilla;
Teste David cum Sibylla.

Verse 2

Quantus tremor est futurus
Quando judex est venturus
Cuncta stricte discussurus!

Verse 3

Tuba mirum spargens sonum
Per sepulchra regionum
Coget omnes ante thronum.

Verse 4

Mors stupebit et natura,
Cum resurget creatura,
Judicanti responsura.

Verse 5

Liber scriptus proferetur,
In quo totum continetur,
Unde mundus judicetur.

Verse 6

Judex ergo cum sedebit,
Quidquid latet apparebit:
Nil inultum remanebit.

Verse 7

Quid sum miser tunc dicturus?
Quem patronum rogaturus
Cum vix justus sit securus?

Verse 8

Rex tremendae majestatis,
Qui salvandos salvas gratis,
Salva me, fons pietatis.

Verse 9

Recordare, Jesu pie,
Quod sum causa tuae viae;
Ne me perdas illa die.

Verse 10

Quaerens me, sedisti lassus:
Redemisti Crucem passus:
Tantus labor non sit cassus.

Verse 11

Juste Judex ultionis,
Donum fac remissionis,
Ante diem rationis.

Verse 12

Ingemisco, tamquam reus:
Culpa rubet vultus meus;
Supplicanti parce, Deus.

Verse 13

Qui Mariam absolvisti,
Et latronem exaudisti,
Mihi quoque spem dedisti.

Verse 14

Preces meae non sunt dignae,
Sed tu bonus fac benigne,
Ne perenni cremer igne.

Verse 15

Inter oves locum praesta,
Et ab haedis me sequestra,
Statuens in parte dextra.

Verse 16

Confutatis maledictis,
Flammis acribus addictis,
Voca me cum benedictis.

Verse 17

Oro supplex et acclinis,
Cor contritum quasi cinis:
Gere curam mei finis.

Verse 18

Lacrimosa dies illa,
Qua resurget ex favilla.

Verse 19

Judicandus homo reus:
Huic ergo parce Deus.

Verse 20

Pie Jesu Domine,
Dona eis requiem.
Amen.