Pange, lingua, gloriosi lauream certaminis,
Et super Crucis tropaeo dic triumphum nobilem:
Qualiter Redemptor orbis immolatus vicerit.

De parentis protoplasti fraude Factor condolens,
Quando pomi noxialis in necem morsu ruit:
Ipse lignum tunc notavit, damna ligni ut solveret.

Hoc opus nostrae salutis ordo depoposcerat,
Multiformis perditoris arte ut artem falleret,
Et medelam ferret inde hostis unde laeserat.

Quando venit ergo sacri plenitudo temporis,
Missus est ab arce Patris Natus, orbis Conditor:
Atque ventre virginali carne amictus prodiit.

Lustra sex qui jam peregit, tempus implens corporis,
Sponte libera Redemptor Passioni deditus,
Agnus in Crucis levatur immolandus stipite.
Refrain: Crux fidelis, inter omnes arbor una nobilis:
Nulla silva talem profert fronde, flore, germine.
Dulce lignum, dulces clavos, dulce pondus sustinet.